Эмэгтэйчүүдийн Манлайлал Хөтөлбөрийн нийгмийн хөгжлийн төслүүд

2017-03-28

About the Zorig Foundation


Нийгэмд эерэг өөрчлөлт авчрах төслүүдийг  "Эмэгтэйчүүдийн Манлайлал Хөтөлбөр"-т оролцогчид хөтөлбөрийн хүрээнд хэрэгжүүлдэг билээ. Австралийн тэтгэлэгт хөтөлбөрөөр суралцаж төгссөн хүмүүсийг хамруулдаг энэ хөтөлбөрийг Зориг сан Австралийн Квинслендийн их сургуультай  хамтран хэрэгжүүлж байгаа юм.  Ингээд  оролцогчдын олж авсан мэдлэг чадвараа ашиглан хэрэгжүүлж буй нийгэмд тустай бичил төсөлтэй танилцъя. 

"ЭРДМИЙН БОГЦ" БАГИЙН ОРОН НУТГИЙН ХҮҮХДҮҮДЭД СУРГУУЛИЙН ӨМНӨХ БОЛОВСРОЛ ОЛГОХ ТӨСӨЛ

Төслийн зорилго: Увс аймгийн Ховд, Өмнөговь сумын малчдын цэцэрлэгт хамрагдаж чадахгүй байгаа 4-5 насны хүүхдүүдэд нас, сэтгэл зүйд нь тохирсон ном, зурагт ном, тоглоом түгээж, шүд, гараа угаах, нийтийн ариун цэврийн өрөөг ашиглах талаар мэдлэг олгож, сургуульд орохоос нь өмнө сургуулийн орчинтой танилцуулах, хүүхдүүдийг сургуульд ороход бэлдэх. Эхний богцоо суралцаж дуусаад дараагийн богцоо авч ашиглах боломжтой 5 төрлийн эрдмийн богцыг төслийн хүрээнд хүүхдүүдэд түгээн хэрэглүүлнэ.

Хэрэгжүүлэх ажил:
-Төслийн танилцуулга, зурагт хуудас хэвлүүлэн хэд хэдэн уулзалтыг зохион байгуулжээ.
-Төслийг нийгмийн сүлжээнд сурталчилах, санхүүжилт бүрдүүлэх зорилгоор Улсын арслан Н.Батсуурь 5000 төгрөгний аян эхлүүлж, амжилттай явагдаж байна. Одоогийн байдлаар 600 мянган төгрөг цуглажээ.
-Төслийн хүрээнд хийлгэх сургалтуудын гарын авлага, богцод агуулагдах тоглоом, ном, эрүүл мэндийн зурагт хуудаснуудыг мэргэжлийн багийн дэмжлэгтэй, шинжлэх ухааны үндэслэлтэй бүрдүүлэх талаар МУБИС-ийн СӨБ-ийн сургууль, БСШУСЯ, ЭМЯ, НЭМХ-ийн мэргэжилтнүүдтэй уулзалт, зөвлөгөө авч ажиллаж байгаа аж.
-Төслийн бусад санхүүжилтыг босгох үүднээс 2017 оны 2 дугаар сарын 24-ны өдөр 19 цагаас Bojangles Grill зоогийн газар Quiz night буюу Асуулттай хөгжилтэй үдшийг Bojangles Grill-ийн найрсаг хамт олонтой хамтран зохион байгуулахаар төлөвлөжээ.
-Өөрсдийн дотоод нөөц боломжиндоо тулгуурлан сонирхсон байгууллагуудад “Эрүүл хүнс” сэдэвт сургалт зохион байгуулахаар төлөвлөж, хамтран ажиллах байгууллага эрэлхийлэн ажиллаж байгаа юм байна.


Төслийн хамрах хүрээ: Увс аймгийн Ховд болон Өмнөговь сумдын малчдын 4-5 настай 50-60 хүүхэд, малчин эцэг эх, 2 багш хамрагдана.

"Хөдөө орон нутгийн хүүхдүүдэд сурч боловсрох нөхцөл бололцоо хотын хүүхдүүдийнхээс хамаагүй бага байдаг. Алслагдсан сумдад хүрч ажиллахыг хичээж хамгийн хол, хэр барагтай төсөл хэрэгждэггүй сумдыг сонгосон." Багийн гишүүд

Төслийн санхүүжилт: Одоогоор Австралийн засгийн газраас 12 сая төгрөгийн санхүүжилтийг авсан ба Facebook challenge-ийн хүрээнд 600 мянган төгрөг цуглуулжээ.
Дэлгэрэнгүй мэдээлэл: Эрдмийн богц (фэйсбүүк), Холбогдох утас 9900 3768, 8088 2266

"ГЭРЭЛТ ИРЭЭДҮЙ" БАГИЙН ЖИРЭМСЭН ЭМЭГТЭЙЧҮҮДЭД ЧИГЛЭСЭН ТӨСӨЛ

Төслийн зорилго: Эх, нялхсын эндэгдэл, түүний шалтгаан болох жирэмсэн үеийн эмгэгийг бууруулах зорилгоор жирэмсний хяналтыг сайжруулах, жирэмслэлтийн талаарх мэдлэгийг дээшлүүлэх, жирэмсэн эмэгтэйг хүрээлж буй хүмүүсийн нийгмийн хариуцлагыг нэмэгдүүлэх.
Хэрэгжүүлэх ажил:

Гарын авлага – жирэмсний үедээ хэрхэн хооллох, хувцаслах, эмгэг шинж тэмдгийг хэрхэн ялган таньж арга хэмжээ авах, дасгал хөдөлгөөн, төрсний дараах нярайн асаргаа сувилгааг хэрхэн хийх зөвлөгөөнүүд, бусад хэрэгцээт мэдээллийг агуулсан гарын авлагыг эх барих эмэгтэйчүүдийн хяналтыг улсын хэмжээнд явуулдаг эмнэлгүүдийн мэргэшсэн эмч нарын баг боловсруулжээ.
Баримтат кино нэвтрүүлэг –Монголын орчин нөхцөлд жирэмсний хяналтанд орсон үеэс төрөх хүртэлх жирэмсний хугацаан дахь үеийг харуулж, эрдэмтэн эмч нарын зөвөлгөөг тусгасан баримтат киног анх удаа хийж байгаа аж.
Төслийн хамрах хүрээ:
Төслийн хугацаанд хамгийн багадаа 2000 гарын авлагыг Улаанбаатар хотын 2 дүүргийн жирэмсний хяналтанд орж буй эхчүүдэд эхний ээлжинд хүргэхээр төлөвлөжээ. Түүнчлэн телевизийн баримтат кино байдлаар мэдээлэл болон хүрч байгаагаараа олон хүнд хүрэх маш өргөнтэй төсөл юм. Төслийн үр дүн жил бүр хяналтанд орж байгаа 80,000 орчим эхчүүдээр хязгаарлагдахгүй цаашид ч үр өгөөжөө өгөх боломжтой.

"Манай төслийн онцлог бол эмэгтэйчүүд өөрсдөө нийгэмд тулгамдаж байгаа асуудлыг тодорхойлоход хувь нэмэр оруулж, арга хэмжээ авч асуудлыг шийдвэрлэхэд баг болон хамтран ажиллаж, бодит үр дүнг авчирч байгаа явдал юм." Төслийн багийн удирдагч З.Сэргэлэн

Төслийн санхүүжилт: Одоогоор Австралийн засгийн газрын 13.5 сая төгрөгийн санхүүжилтээр төслийн үйл ажиллагаа хэрэгжээд эхэлжээ. Мөн Facebook challenge буюу сошиал медиа маркетингийн үр дүнд 165,000 төгрөг цугларсан байна. Үүнээс гадна тус төслийг сайн дураараа хамтран хэрэгжүүлж буй "НамуунЗэт" продакшин 1.8 сая төгрөг, эх барих хяналтын эмч нар 4.5 сая төгрөгийн хандив өгчээ.

Төслийн дэлгэрэнгүй мэдээлэл:
Эрүүл жирэмслэлт / Healthy pregnancy pioneer project (фэйсбүүк), 

ХӨДӨЛГӨӨНИЙ БЭРХШЭЭЛТЭЙ ХҮҮХДЭД ЧИГЛЭСЭН “FROM DISABILITY TO ABILITY” ТӨСӨЛ

Төслийн зорилго: Хөдөлгөөний бэрхшээлтэй хүүхдүүдэд Австрали улсад хийгдсэн чанар сайтай тэргэнцрийг бэлэглэж, цаашид сургуульд тасралтгүй хамрагдахад нь дэмжлэг үзүүлэх, нийгэм, улс төрийн байгууллагуудаас хөгжлийн бэрхшээлтэй хүүхдүүдэд үзүүлэх халамж, үйлчилгээ, хандлагыг дээшлүүлэх.
Хэрэгжүүлэх ажил:
-Хөрөнгө босгон хөдөлгөөний бэрхшээлтэй хүүхдүүдэд зориулан Австрали улсаас 2 агуулах буюу 332 тэргэнцэр тээвэрлэн авчирч, Сонгино хайрхан дүүргийн өрх толгойлсон эцэг, эхтэй, амьдралын боломж тааруу болон тусгай сургуулиудын 60 хүүхдэд одоо байгаа тэргэнцрийг биед нь зохих шаардлагын дагуу тааруулж, 3 сарын витамины хэрэгцээг нь хангаж, эмчийн үзлэг, оношлогоонд хамруулна.

-Эцэг эх, асрамжлагч нарт зориулан сэтгэл зүйн бэрхшээлийг даван туулж, цаашид хүүхдээ улам сайн асрахад нь дэмжлэг үзүүлэх сургалтыг зохион байгуулж, хөгжлийн бэрхшээлтэй хүүхдийг зөв халамжлан асрах агуулгатай, бусдад урам зориг өгөх түүх, сургамж бүхий гарын авлага бэлтгэнэ.

-Түүнчлэн 2017 оны 2-р сарын 09-ны өдөр 19 цагаас Туушин зочид буудалтай хамтран Хандивын үдэшлэгийг зохион байгуулна. Энэхүү арга хэмжээг Австралийн элчин сайдын яамнаас дэмжин, Элчин сайд ноён Жон Лангри үг хэлэхээр болжээ.


Төслийн хамрах хүрээ: Сонгино хайрхан дүүрэг, тусгай сургуулиудын нийт 60 хөдөлгөөний бэрхшээлтэй хүүхэд хамрагдана.

Иргэний нийгэм, бизнес, төрийн байгууллагуудаас хөгжлийн бэрхшээлтэй хүүхдүүдэд ирэх халамж, анхаарлыг дээшлүүлэх нь манай төслийн цаад зорилго." Төслийн багийн гишүүн Даариймаа

Төслийн санхүүжилт: Энэ төслийн зардлыг нийт 46 сая төгрөг гэж төлөвлөснөөс одоогоор "Даян" компани, Иргэдийн төлөөлөгчдийн хурлын гишүүд, Худалдаа Хөгжлийн Банкнаас мөнгөн хандив орж ирсэн байна. Мөн "Тунгалаг Аялгуу" чих хамар хоолойн эмнэлэг эхний контейнер тэргэнцрийг нийт 5 аймаг, 4 дүүрэгт тараах, агуулахын байр, хүн хүчээр хангах ажилд тусалж байгаа ажээ.

Дэлгэрэнгүй мэдээлэл: Хүүхдийн тэргэнцэр-Wheelchairs for kids in Mongolia (фэйсбүүк)

"ӨӨРЧЛӨЛТИЙН ТӨЛӨӨ ХАМТДАА" БАГИЙН "ЗАМ ТЭЭВРИЙН ОСОЛГҮЙ СУРГУУЛЬ" ТӨСӨЛ

Төслийн зорилго: Сургуулийн орчныг "Сургуулийн бүс. Техникийн ерөнхий шаардлага MNS 6444:2014" стандартын дагуу аюулгүй бүс болгон тохижуулах; сурагчдад замын хөдөлгөөнд зөв оролцох дадал эзэмшүүлэх кабинет байгуулах; тус сургуульд суралцаж байгаа 6-14 насны хүүхдүүдийн замын хөдөлгөөний талаарх мэдлэг, мэдээллийг нэмэгдүүлэн, аюулгүй зорчих дадал, зуршилд сургах.
Хэрэгжүүлэх ажил: “Зам тээврийн осолгүй сургууль” төсөл 2017 оны 2 сарын 1-нээс 5 дугаар сарын 26-ны хооронд хэрэгжиж, 2 гэрлэн дохио, 62 метрийн урттай 5 хурд сааруулагч, 34 ширхэг тэмдэг тэмдэглэгээ, 600 орчим метр хайс байрлуулах; тус сургууль дээр хөдөлгөөний аюулгүй байдлын сургалтын өрөө тохижуулах, мэдээллийн самбар байрлуулах, замын хөдөлгөөний сургалт, мэдээлэл өгөх боловсон хүчин бэлтгэх, сургалтын материал боловсруулах; сошиал медиа, олон нийтийн мэдээллийн хэрэгслээр тодруулбал телевиз, радио, веб сайтуудаар замын хөдөлгөөний аюулгүй байдлыг сурталчилсан контент боловсруулан, олон нийтэд түгээх ажлуудыг хийх юм.
Төслийн хамрах хүрээ: Статистикаар суралцагч хүүхдүүд нь улсын дунджаас хоёр дахин илүү осолд өртөж байгаа Чингэлтэй дүүргийн 5 дугаар сургуулийг төслийн баг сонгож авчээ. Уг төслийн үндсэн хэсэг нь зорилтот 5 дугаар сургуулийн 6-14 насны 2300 орчим сурагчдад чиглэн хэрэгжих боловч төслийн үр дүнд сургуулийн нийт сурагчид, ойролцоох орон сууцны хорооллын хүүхдүүд, хүн амын зорчих хэсгийн аюулгүй байдал дээшилнэ гэж үзжээ. Сургалт сурталчилгааны дэд хэсэг илүү өргөн хүрээтэй бөгөөд энэ нь Улаанбаатар хотын нийт хүн амын дунд замын хөдөлгөөний соёлыг сайжруулах, сонор сэрэмжийг дээшлүүлэх өргөн хүрээтэй зорилго агуулжээ.

"Бид бүгдээрээ явган зорчигч, жолооч, асран хамгаалагч байдаг. Иймээс замын хөдөлгөөний аюулгүй байдалд хүн бүрийн хамтын оролцоо, үйлдэл, үүрэг хариуцлага чухал. Аюул, осолгүй амар тайван Монголын төлөө хамтдаа! Бид чадна." Төслийн багийн гишүүн Т.Энхтунгалаг

Төслийн санхүүжилт: Төслийг бүрэн хэрэгжүүлэхэд нийт 78 сая төгрөг төсөвлөжээ. Төслийн багийнхан нийгмийн өндөр хариуцлага бүхий байгууллага, хувь хүмүүс, эцэг эхчүүдэд хандахын зэрэгцээ бусад арга хэмжээг зохион байгуулан ажиллаж байна. Одоогоор мөнгөн хэлбэрээр 20 сая, мөнгөн бус хэлбэрээр 2.5 сая төгрөгний санхүүжилт төвлөрүүлжээ.

Мэдээллийн эх сурвалж (Unread.today)

“АЛХАЦГААЯ МОНГОЛЧУУД АА” ТӨСӨЛ

Төслийн зорилго: Алхацгаая Монголчууд аа" төсөл нь амьдралын эрүүл хэв маягийг сурталчилж, нас харгалзахгүйгээр хийж болох энгийн дасгал хөдөлгөөнүүдийг түгээн дэлгэрүүл зорилготой.
Хэрэгжүүлсэн ажил: Тус төслийн баг 6 – р сарын 6 – ны өдөр төслөө албан ёсоор нээж, Чингисийн талбайд 1500 үзэгчдийн өмнө дасгалаа хийж үзүүлсэн бөгөөд энэ үеэр дасгалын заавартай хуудас, номны хавчуургыг тарааж сурталчилсан байна. Түүнчлэн амьдралын эрүүл хэв маягийн талаарх олон нийтийн ойлголтыг сайжруулах үүднээс хэвлэл мэдээллийн хэрэгслээр төслөө сурталчилж, гадаад, дотоодын байгууллагуудаас хандив цуглуулжээ. Мөн тус багийн бүтээсэн "Алхацгаая Монголчууд аа" дасгалын нэвтрүүлэг LikeHD сувгаар өглөө бүр 8:05-аас, SPS World сувгаар өглөө бүр 8:45 цагаас тус тус гарч байна.

“БҮТЭЭЛЧ АХМАД ҮЕ” ТӨСӨЛ

Төслийн зорилго: "Бүтээлч Ахмад Үе" төсөл нь ахмад настны ажил эрхлэлтийг нэмэгдүүлэх, тэдэнд зориулсан мэдээ, мэдээллийг сайжруулах замаар Монгол Улсын эдийн засгийн хөгжилд хувь нэмэр оруулахыг зорьж байна.

Хэрэгжүүлсэн ажил: Ахмадын ажил эрхлэлтийг дэмжих зорилгоор тус баг ахмад зөвлөгч Цэнд – Аюуш гуайгаар 5 – р сургуулийн 5 – р ангийн сурагчдад хичээл заалгаж, тус хичээлийг дүрс хальсанд буулгаж, ахмадын ажил эрхлэлтийг түгээн сурталчлахад ашиглах аж. Түүнчлэн ахмадуудын санхүү, нийгмийн чадамжид дэмжлэг болох үүднээс тэдний оюуны өмчийг ашиглах, олон нийтэд хүргэх мөн тэдэнд зориулан хэрэглэхэд хялбар байдлаар ахмадын олон нийтийн сүлжээг үүсгэх зорилгоор Монголын Ахмадын Холбоотой хамтран www.ahmad-ue.mn цахим хуудсыг бүтээсэн. Одоогоор, тус төслийн баг ахмадуудтай уулзах чуулга уулзалтыг зохион байгуулж байгаа бөгөөд уулзалтын үеэр ахмадуудад цахим хуудсаа танилцуулж тэд нартай санал бодлоо солилцох ажээ

“ХҮҮХДИЙН НЭВТРҮҮЛЭГТ ДОХИОНЫ ХЭЛИЙГ СТАНДАРЧЛАХ НЬ” ТӨСӨЛ

Төслийн зорилго: "Хүүхдийн Нэвтрүүлэгт Дохионы Хэлийг стандарчлах нь" төсөл нь сонсголын бэрхшээлтэй хүүхдүүдэд зориулсан хүүхдийн нэвтрүүлэгт дохионы хэлийг нэвтрүүлж стандарчлахыг зорьж байна.

Хэрэгжүүлсэн ажил: Төслийн хүрээнд багийн гишүүд Sundowners хандив цуглуулах арга хэмжээ зохион байгуулж, дотоод гадаадын санхүүжүүлэгч байгууллагуудад төслөө танилцуулж, сонсголын бэрхшээлтэй хүүхдүүдийн урласан зүйлсийг худалдаж, санхүүжилтээ зузаатгав. Өнгөрсөн 5 сарын хугацааанд тус төслийн баг хүүхдийн 8 нэвтрүүлгийг дохионы хэлтэй гаргаж, дохионы хэлийг хүүхдийн нэвтрүүлэгт стандарчлах журмыг баталгаажуулахад дорвитой хувь нэмэр оруулсан байна.

“НОМТОЙ НӨХӨРЛӨСӨН ГЭР БҮЛ” ТӨСӨЛ

Төслийн зорилго: "Номтой Нѳхөрлөсѳн Гэр Бүл" төсөл нь улсын асрамжийн Өнөр бүл төвийн хүүхдүүдийг ном уншуулах замаар боловсрол олгох зорилготой.

Хэрэгжүүлсэн ажил: Төслийн хүрээнд тус багийн гишүүд Өнөр бүл төвийн хүүхдүүдийн урласан зүйлсийг худалдаж, БСШУЯ, Save the Children ТББ, PWC, Хөгжлийн шүтэлцээ ТББ, Монголын Бизнесийн Дээд Сургууль зэрэг байгууллага, хувь хүмүүстэй холбоо тогтоон санхүүжилтээ босгосон. Мөн төслийн хамт олон төслийн нээлтийн үйл ажиллагааг амжилттай зохион байгуулж, Монгол дахь Австралийн тэтгэлгүүд хөтөлбөр, Зориг сан, улсын болон хувийн хандивлагч байгууллагууд, Өнөр бүл төвийн багш сурагчдын хамтаар оролцсон. Өнөр бүл төвийн бусад байгууллагуудтай шууд хамтын ажиллагааг өргөжүүлэх, хүүхдүүдэд унших боломжийг бүрдүүлэх чухал арга хэмжээ болох нь нээлтийн үеэр харагдсан. Өнөр бүл төв Хүүхдийн номын ордон, Австралийн Улаан Загалмай болон бусад хувь хандивлагчидтай хамтын ажиллагааг эхлүүлж, номын сангийн орчин сайжирч, унших номын жагсаалт нэмэгдэж, багш нарын сургалт зохион байгуулагдаад байна.